Пред еден месец Агенцијата за национална безбедност (АНБ) до Основното јавно обвинителство доставила три известувања за поранешен директор и група вработени во Агенцијата, поради индиции за незаконско, непрофесионално и неетичко постапување, велат од АНБ.
До оваа констатација во Агенцијата дошле по внатрешна истрага направена по смената на власта, а истата се однесувала за периодот од 2019 до 2024 година.
Во тој период со Агенцијата раководеа Виктор Димовски и Заре Милошевски.
Aктуелен директор е Бојан Христовски.
Истрагата, како што велат од таму, довела до сознанија за оформување предмети за оперативни обработки на опозицијата, лидер на опозициска партија и група новинари и медиуми чија цел била уривање на власта.
Цел пак на друга обработка, меѓу другото, биле јавен обвинител и министер во тогашната влада.
Биле утврдени и случаи на намерно одолговлекување на безбедносни проверки, како што е случајот со еден пратеник на тогашната опозиција, во постапката за добивање безбедносен сертификат.
Истрагата на АНБ утврдила дека во овие случаи противправно биле користени материјално-техничките ресурси на Агенцијата, а незаконски се спроведувало и следење на комуникациите.
