(Видео) Како ќе изгледа по првата фаза булеварот „Македонија“, со чија реконструкција ќе се стави во функција подземната сообраќајница кај „Лимак“

Вчера во Скопје започна реконструкцијата на булеварот „Македонија“.

Проектот има пет фази, а ги опфаќа влезовите и излезите од подземната сообраќајница под станбено-деловниот комплекс „Лимак“, која е веќе изградена.

ПОВРЗАНИ ВЕСТИ

(Галерија) Во Скопје конечно ќе се вози по подземната сообраќајница кај „Лимак“: Започнаа градежните активности на булеварот „Македонија“

Нејзиното целосно ставање во функција е возможно само со реализација на сите фази.

Во првата фаза ќе се изврши реконструкција и рехабилитација на постоечкиот коловоз, како и проширување на одделни коловозни ленти.

Проектот ги опфаќа булеварот „Борис Трајковски“ (кај Рампа), улицата „11 Октомври“, улицата „Пролет“, како и крак од булеварот „Македонија“ до влезот во булеварот „Борис Трајковски“, каде што завршува со вклинување во постоечкиот профил и продолжува кон втората фаза.

Во оваа фаза се предвидува и проширување на улицата „Пролет“ во правец од Полициската станица “Пролет“ до “Тутунскиот комбинат“, со дополнителна коловозна лента.

Во другите фази, се предвидува изградба на кружен тек кај „Нова Македонија“, како и уште два кружни текови на потегот меѓу булеварот „Кочо Рацин“ и улицата „Јордан Мијалков“ (Железничка), како и проширување на булеварот “Св. Кирил и Методиј“.

Подземната сообраќајница ќе располага со вкупно шест ленти, четири за двосмерен автомобилски сообраќај, две наменети за јавен превоз, како и дополнителни пешачки патеки.

Фото/видео: Град Скопје