Неврохируршки тим на Клиника Жан Митрев успешно изврши операција на 60-годишна пациентка кај која беше дијагностициран комплексен тумор на мозокот, лоциран на базата на черепот и во непосредна близина на витални мозочни крвни садови.
Интервенцијата ја изведе неврохируршкиот тим во состав проф. д-р Владимир Рендевски и д-р Михаил Таушанов, при што беше применета микроневрохируршка техника за прецизно и безбедно отстранување на туморот.
„Имавме шеесетгодишна пациентка со дијагностициран тумор на мозокот, локализиран во десниот темпорален резен, прилепен врз черепната бараза и врз свеноидалниот гребен во непосредна близина на десната внатрешна каротидна артерија и нејзините гранки. Со колегата д-р специјалист Михаил Таушанов направивме целосно оперативно отстранување на туморскиот процес со користење на микроневрохируршки пристап и оперативен микроскоп и притоа со максимално можно зачувување на виталните мозочни артерии“, објасни проф. д-р Рендевски.
Пациентката беше примена со прогресивна психомоторна забавеност, проблеми со меморијата и памтењето во изминатите четири месеци, како и епизоди на нарушена рамнотежа и падови. По направените радиолошки иследувања со нуклеарна магнетна резонанца, беше потврден туморски процес во мозокот, по што беше поставена индикација за оперативно лекување.
Пациентката е во стабилна состојба и успешно се опоравува по оперативниот зафат.
