На 19. мај во Кавадарци свечено беа отворени новите простории на M6 Едукативен центар – регионален хаб кој има за цел да ги поврзе младите, образованието и бизнис секторот, поттикнувајќи развој на вештини, иновации и нови можности за идните генерации.
Центарот е основан во рамки на иницијативата за „Ангажирање на приватниот сектор“, како партнерство помеѓу M6 Едукативен центар, 30 македонски компании и проектот „Образование за вработување (E4E)“ имплементиран од Хелветас Северна Македонија, а поддржан од Амбасадата на Швајцарија.
-Како компанија која долгорочно верува во значењето на образованието, практичното знаење и одржливиот развој, FMS беше дел од поддржувачите на оваа иницијатива.
Поддршката од FMS опфаќа инвестиција во современи вентилациски решенија и надгледни средства за HVAC системите во просторот на центарот, овозможувајќи им на учениците и посетителите директен увид во функционирањето на современи технички системи преку реални примери и практична примена, информираат од таму.
Од компанијата истакнуваат дека вложувањето во знаење, младите и современите услови за учење претставува вложување во иднината на целото општество.
-Веруваме дека компаниите имаат важна улога во создавање можности за младите луѓе и во поддршка на образовни иницијативи кои носат долгорочна вредност за заедницата. Особено ни е важно што овој центар ќе овозможи практично учење, развој на вештини и директно запознавање со современи технологии, велат од FMS.
На свеченото отворање се обратија основачот на M6 Group, Светозар Јаневски, извршната директорка на M6 Едукативен центар, Елена Младеновска Јеленковиќ, заменик-амбасадорот на Швајцарија во Македонија, Михал Харари, како и градоначалникот на Општина Кавадарци, Митко Јанчев.
Во нивните обраќања беше потенцирана важноста од соработка помеѓу образованието, институциите и приватниот сектор, како клучен предуслов за создавање квалификуван кадар, задржување на младите и поттикнување локален и регионален развој.
-FMS останува посветен на поддршка на проекти и иницијативи кои придонесуваат кон подобри услови за учење, технолошки развој и создавање поквалитетна иднина за младите генерации, велат од таму.
