Претседателката Гордана Сиљановска Давкова денеска се обрати на Светскиот самит на лауреати во Дубаи, Обединетите Арапски Емирати (ОАЕ), во рамки на Светскиот самит на владите.
„Во време на забрзан развој на вештачката интелигенција, промените во светот бараат длабока промена во образованието – образование што не се сведува на меморирање факти, туку на градење критичко и креативно размислување, етичко расудување и емоционална интелигенција.
Вештачката интелигенција не треба да се забранува, туку мудро да се регулира. Таа мора да биде транспарентна, фер и водена од човекот, да биде алатка, а не господар. За тоа ни е потребен глобален консензус,“ рече Сиљановска Давкова.
Претседателката оствари и средба со македонски граѓани кои живеат и работат во ОАЕ.
„Разговаравме за нивниот професионален ангажман и искуствата од животот во оваа држава. Посебно ме радува нивната успешна интегрираност во овдешното општество и нивното присуство на одговорни и значајни позиции. Тие се мост за соработка на економски и трговски план, но и во сите други општествени сфери. Наша задача е да овозможиме услови за искористување на потенцијалите што тие ги имаат.
Идеите што ги чув на средбата се уште една потврда за знаењето и посветеноста на македонските граѓани, каде и да живеат и работат,“ вели Сиљановска Давкова.
Фото: Кабинет на претседателката
