Македонската претседателка Гордана Сиљановска Давкова ја предводеше македонската делегација за 80. Генерално собрание на Обединетите нации (ОН), кое се одржа во Њујорк, САД.
Во делегацијата беа и министерот за надворешни работи и надворешна трговија, Тимчо Муцунски, како и министерот за eвропски прашања Орхан Муртезани.
Претседателката, освен што имаше свое обраќање од говорницата во ОН, во Детроит, се обрати и на свеченоста по повод 20. годишнината од основањето на Обединетата македонска дијаспора, а присуствуваше и на приемот што го приредија претседателот на САД, Доналд Трамп и неговата сопруга Меланија Трамп, по повод 80. Генерално собрание на ОН.
ПОВРЗАНИ ВЕСТИ
Сиљановска Давкова одржа и предавање на Светскиот лидерски форум при Универзитетот Колумбија во Њујорк, а присуствуваше и на одбележувањето на 30 годишнината од воспоставувањето на дипломатските односи со САД.
Имаше средба со Брендан Ханрахан, шеф на Бирото за европски и евроазиски прашања во американскиот Стејт Департмент, се обрати на сесијата посветена на 30 годишнината од Светската програма за млади, којашто се одржа во рамките на 80. Генерално собрание на ОН, а беше и на прием организиран од Меѓународниот центар „Низами Ганџави“.
Беше и дел од работната средба за лидерите од Западен Балкан, организирана од високата претставничка на Европската Унија за надворешни работи и безбедносна политика, Каја Калас, а имаше средба и со генералниот секретар на ОН, Антонио Гутереш.
Се обрати и на самитот ,,Конкордија”, којшто се одржуваше паралелно со Генералното собрание на ОН, беше на прием организиран од Американско-балканската стопанска комора, како и на тематски работен ручек „Women Rise for All“, приреден од заменик генералната секретарка на ОН, Амина Мохамед.
Се обрати и на состанокот на високо ниво по повод 30 годишнината од Четвртата светска конференција за жените, во рамки на 80. Генерално собрание.
Фото: Кабинет на претседателката
