Македонија доби уште пет години од Комитетот за светско наследство на Организацијата за образование, наука и култура на Обединетите Нации – УНЕСКО, за да ги спроведе забелешките на Организацијата, за да Охридскиот регион не заврши на Листата на светско наследство во опасност.
Одлуката е донесена на сесија на УНЕСКО што се одржува во Бусан, Јужна Кореја. За истата „за“ гласале 16 земји од вкупно 21. членка на Комитетот, а е донесена врз основа на потпишаното писмо со обврски и приоритети што ги презела Владата и општините од регионот.
Претходно во нацрт-одлуката на Комитетот се предлагаше природното и културното наследство на Охридскиот регион во Македонија и Албанија, да биде впишано на Листата на светско наследство во опасност, бидејќи напредокот во однос на забелешките на УНЕСКО е недоволен, а заканите се сериозни, и дека главните ризици не биле отстранети.
Природното и културното наследство на Охридскиот регион е прогласено за светско наследство на третата седница на УНЕСКО во 1979 година. Во 2019 година, ова подрачје е проширено за да го вклучи и албанскиот дел од езерото, и со тоа стана меѓудржавно светско наследство.
