Земја во фокус на 17-тото издание на Фестивалот на креативен документарен филм „МакеДокс“ е Шпанија, а програмата со современи шпански документарни филмови беше отворена на 21 август во Куршумли ан со проекција на филмовите „Роење птици“ на Ксавиер Марадес и „Амилкар“ на Мигел Еек.
Изолиран за време на карантините поради ковид-19, во филмот „Роење птици“ Ксавиер ги снима хипнотизирачките летови на сколовранците над својот роден град во Шпанија. Нивните движења му ги будат сеќавањата за неговата дијагноза за ХИВ и длабоката копнеж за поврзување. Преку гласовните пораки со својот љубовник во Бразил, пркосниот дух на раниот активизам за сида во Њујорк и силата на предците на афро-бразилските ритуали кандомбле, филмот станува слоевита медитација за тагата, преживувањето и колективната отпорност.
Долгометражниот документарен филм „Амилкар“ на Мигел Еек го прикажува легендарниот африкански антиколонијален револуционер Амилкар Кабрал како организатор и интелектуален водач на движење, чија визија ја разбиваат внатрешните борби за моќ и смислената субверзија, што на крајот кулминира со негово убиство. На проекцијата присуствуваше авторот Мигел Еек, кој по филмот одговараше на прашања од публиката за процесот на снимањето на филмот, кој траел речиси 12 години.
За процесот на создавање документарен филм, авторите Мигел Еек и Ксавиер Марадес на 24 август, во 11 часот, ќе одржат мастерклас во „Лабораториум“. На мастеркласот тие ќе се осврнат на многуте видливи и невидливи сили што го обликуваат еден документарен филм уште долго време пред да стаса до публиката. Преку одбрани извадоци од своите филмови, тие ќе истражуваат како личните емоции, односот со протагонистите, етичката одговорност, општествената и политичката клима, продукциските околности, па дури и автоцензурата влијаат врз креативниот процес.
Во програмата на шпански филмови следниве денови ќе бидат прикажани извонредните документарни остварувања: „Цел еден живот“ на Марта Ромеро, „Камени богови“ на Иван Кастињерас, „Господе, земи ме наскоро“ на Гиљермо Ф. Флорез, „Дневник за уценување“ на Патриција Франкеса, „Сатурн“ на Даниел Торнеро и „Задушена светлина“ на Луис Сампиери.
Програмата е надополнета и со избор на кратки документарни филмови од Канарските Острови, како и со експериментални краткометражни дела од Перу, селекција создадена во соработка со фестивалот МУТА – Меѓународен фестивал на аудиовизуелна апропријација. Целата програма е поддржана од Амбасадата на Кралството Шпанија.
Претпладневните часови на 22 и 23 август во „Лабораториум“ се посветени на Програмата за деца и млади. Две утра, две детски работилници и многу простор за сонување, игра и создавање на „МакеДокс“.
На 23 август (недела) во „Лабораториум“ ќе се одржи кафе-дружба со „Некстас“, која ќе почне во 13 часот. Тематскиот наслов на дружбата е „Филм или диктат?“, а „МакеДокс“ покани наставници од основните и средните училишта кои се љубопитни за користење на документарни филмови во наставата. Од 13 до 14:10 ќе биде прикажан филмот „Замокот“, а од 14:10 до 15 часот ќе се одржи дискусија со Надица Таневска Јанева, наставник по Социологија во СУГС „Георги Димитров“.
Комплетната програма на 17. „МакеДокс“ може да се најде на официјалниот сајт: https://makedox.mk/mk/program/
