На денешниот „Марш на ангелите“ кој што се одржа во Кочани, роднините на загинатите во пожарот во дискотеката „Пулс“, го блокираа кружниот тек.
Од таму најавија дека ќе ги радикализираат протестите, најпрвин во Кочани, а потоа и во Скопје. Не прецизираа кога ќе започнат протестите пред Кривичниот суд во Скопје.
„Немаме никакво соопштение од Кривичниот суд од Скопје, никаква дата, никакво објаснување кога ќе почнат рочиштата, ако не успееме со овие блокади во Кочани да добиеме термин за рочиштата, блокадите ќе ги продолжиме во Скопје, пред Кривичен суд,“ изјави мајка на едно од загинатите деца.
Таа побара од адвокатите на обвинетите, малку да имаат чувство за родителите бидејќи излегуваат во медиумите и кажуваат колку ќе трае ова судење, и како што вели, тоа за нив тоа е убиство и им создава поголем револт и стресови.
До Кривичниот суд апелираа побрзо да си ја завршат својата работа и да го закажат рочиштето, бидејќи трпението им е при крај.
„Секој ден се повеќе стресови, нашите деца ги убиваат повторно со тие изјави на крајот ќе излезе дека ние родителите и децата се виновни,“ изјави таа.
Фото/Игор Бансколиев
