Не можевме да го видиме огнот, беше пригушен поради немање кислород, кажа пожарникар на судењето за „Пулс“

На денешното рочиште за пожарот во т.н. дискотека “Пулс“ сведочеше пожарникарот Благој Паунов, кој бил дежурен кобната ноќ.

Тој меѓу друго рече дека дојавата за пожарот ја примиле во 2:35 часот, а за пет минути со колега, со првото возило, пристигнале кај објектот. По нив дошле колеги со уште три возила.

Таму веднаш почнале со извлекување на заглавени лица во т.н. дискотека, а приметиле дека имало многу лица на самиот паркинг, од кои и доста паднати. Паднати лица имало и на скалите, а на влезната врата имало и заглавени повеќе лица кои барале помош.

Како што раскажа пожарникарите извлекувањето го правеле заедно со полицајци, обезбедување и цивили, бидејќи за извлекување на едно лице биле потребни најмалку двајца или тројца.

-Некои беа избезумени, во шок и грч и моравме да ги носиме до паркинг. Други, пак од паника газеа врз нас и други деца за да излезат, кажа тој меѓу друго.

Исто така рече дека кога пристигнале кај “Пулс“ виделе само малку чад како излегува од влезната врата и дека не можеле да го видат огнот, подвлекувајќи дека од искуство смета оти огнот бил пригушен поради немање кислород и истиот поради тоа не можел се шири.

Лично тој учестувал во спасување и на лица заглавни во билетарата, тоалетот…, а кога веќе бил изнемоштен побарал замена во спасувањето, и се вклучил во гасењето на пожарот, кој според него бил изгаснат во 4 часот.

ПОВРЗАНИ ВЕСТИ

Во “Пулс“ имаше хидрант и црево, но немаше вентил, кажа командирот Апостолов, кој и со заштитна опрема, иако не допрел до огнот, добил изгореници и пликови

Фото: Игор Бансколиев