Од денеска престануваат да важат олеснувањата на границите за примена на ЕЕС системот, за влез/излез во земјите на ЕУ.
До 6 септември важеа одредени флексибилности за ЕЕС системот за влез/излез во земјите на ЕУ, вклучувајќи ја и можноста за привремено запирање на прибирањето биометриски податоци за време на летната сезона.
Од денеска, на границите ќе се бара целосна примена на ЕЕС системот, кој подразбира фотографирање и одземање на отпечатоци на прсти.
За време на летната сезона, државите имаа право да ја прескокнат оваа процедура, поради гужвите на границите на туристичките дестинации.
Туристичките агенции и авиокомпаниите предупредуваат дека укинувањето на овие олеснувања може брзо да го врати сообраќајниот хаос на граничните премини. Од друга страна, Европската комисија истакнува дека системот генерално функционирал добро во текот на летото и дека придобивките за безбедноста се очигледни.
Новите биометриски проверки значително го продолжуваат времето за обработка на патниците на пасошките контроли. Според податоците од авиоиндустријата, стандардната пасошка проверка што претходно траеше околу 20 секунди, сега под новиот EES режим бара дури до 90 секунди по патник.
Поради овие застои, меѓународните туристички асоцијации вршат притисок врз Брисел за продолжување на безбедносниот заштитен вентил барем до крајот на зимската сезона. Тие нагласуваат дека аеродромите сè уште немаат доволно автоматизирани киосци и соодветно пополнет кадар за непречено функционирање.
Иако генералната поддршка за модернизација на европските граници постои, експертите предупредуваат дека системот мора да биде целосно подготвен пред да се укине флексибилноста. Во спротивно, септември може да донесе нови сериозни доцнења за сите патници кои доаѓаат од земји надвор од ЕУ.
Фото/Unsplash
