Во насока на обезбедување стабилен и сигурен пренос на електричната енергија, Електродистрибуција и годинава ги реализираше редовните годишни визуелни инспекции на 110 kV и 35 kV надземни водови на целата територија на државата, информираат од компанијата.
„Со теренски увид по целата траса на високонапонските и среднонапонските далекуводи, екипите извршија детална контрола на клучните елементи вклучувајќи ги проводниците, столбовите, овесната опрема и сигурносните растојанија, со цел навремено детектирање и превенција на потенцијални ризици.
Посебен акцент беше ставен на состојбата на столбните места и фундаментите, при што се евидентираа сите забележани недостатоци, оштетувања, присуство на вегетација и корозија, како и состојбата на заземјувањето. Дополнително, беа проверени проводниците, заштитните јажиња, спојните места и визуелните маркирања на далекуводите на премини над автопати, како и состојбата на заштитните коридори со фокус на контрола на вегетацијата и недозволена градба на објекти во овие коридори.
Електродистрибуција, континуирано со највисоко ниво на посветеност, ги реализира сите активности за одржување и модернизација на дистрибутивната мрежа,“ се вели во соопштението.
