Шпела Керин, протетичарка од Кршко, Словенија денеска се сретнала со директорот на Фондот за здравствено осигурување, Сашо Клековски, информираат од таму. Таа ќе има работни посети на Скопје и Кочани за да ја процени состојбата на повредените од трагедијата во Кочани.
„Таа е водечки стручњак протетичар во регионот за протези за раце и за лице (епитези), со над 25 годишно искуство. Инаку во Македонија веќе има петмина корисници на нејзините протези.
Овие естетско-функционални протези се наменети за специфични потреби, се прават скроени по мерки откако ќе заврши процесот на заздравување на кожата,“ велат од Фондот.
На средбата се разговарало и за финансирање од страна на Фондот, за што постојат искуства од Словенија и Хрватска.
Клековски претходно бил во комуникација со амбасадорката Симона Франкел, здравствените власти, како и докторите кои ги водеа тимовите од Израел за помош на повредените од Кочани, д-р Шахар Шапира од Шиба медицински центар и д-р Омер Марин, директор на „Шер Зедек“ во Ерусалим.
Тимовите од Израел што помогнаа по трагедијата во Кочани моментално се ангажирани во третман на повредените од ракетните напади.
Фото: ФЗОМ
