Седмото издание на МакеКоПроДокс форумот се одржа од 25-ти до 27-ти август во МКЦ, обединувајќи филмски автори, продуценти и експерти од Балканот и Европа, со цел зајакнување на соработката во областа на креативната документаристика.
Форумот беше отворен со целодневна програма на 25 август, почнувајќи со средбата „Продуценти со продуценти“, на која учествуваа филмски продуценти од Франција, Балканот и Вишеградскиот регион. Во текот на првиот ден од работата на форумот се одржаа презентација на ИДФА и ИДФА Берта фонд, како и презентација и промоција на интернационалните копродукции поддржани од францускиот CNC, Чешкиот филмски центар и Хрватскиот аудиовизуелен центар, додека активностите на Агенцијата за филм на Северна Македонија ги претстави в.д. директорот Сашко Мицевски. Модераторка на презентациите беше Хеле Хансен.
На вториот ден на форумот се одржаа низа пичинг-сесии, како и средби „еден-на-еден“ помеѓу филмски автори и продуценти. На форумот беа презентирани девет проекти во развој кои беа претставени пред професионалци од областа на креативната документаристика. Форумот заврши на 27 август со презентација на проекти во развој што учествувале со Мини-слејт апликации на програмата „Креативна Европа“.
МакеКоПроДокс форумот е единствена платформа посветена на зајакнување на копродукцијата во областа на креативниот документарен филм низ целиот Балкан. Од своето основање во 2019 година, во рамките на 10-тото издание на „МакеДокс“, Форумот прерасна во витално место за средби на филмски режисери, продуценти, професионалци од индустријата и претставници од филмските центри во регионот.
