ТТК Банка АД Скопје во првите девет месеци од годинава, остварила нето-оперативен приход пред исправка на вредност од 82,6 милиони денари, како резултат на остварени оперативни приходи во износ од 425,6 милиони денари и оперативни трошоци во износ од 343 милиони денари, соопшти Банката преку Македонската берза.
-Во истиот период, исправката на вредност на финансиските средства на нето основа изнесува 5,5 милиони денари. Финансискиот резултат, заклучно со 30.9.2025 година, е позитивен и изнесува 76,8 милиони денари, велат од таму.
За овој период билансната сума на Банката достигнала ниво од 12.225 милиони денари, што претставува раст од 19,1% во споредба со истиот период од претходната година. Во однос на планот, билансната сума е повисока за 801 милион денари или за 7%, посочуваат од таму.
-Порастот на билансната сума на Банката е резултат на зголемувањето на изворите на средства, при што вкупната депозитна база бележи раст од 1.629 милиони денари или 8,8%.
Овој раст, главно, произлегува од зголемувањето на депозитите од секторот домаќинства за 1.036 милиони денари или 16,1%, проследено со раст и на депозитите од финансиски институции за 260 милиони денари или 53,5%, како и со раст кај стопанство за 332 милиони денари или 19,3%.
Планот за депозитите за овој период од годината е надминат за 6,6%, односно за 633 милиони денари повеќе.
Од страна на активата, годишниот раст на билансната сума се должи на зголемување на паричните средства и на паричните еквиваленти и за 728 милиони денари или 22,4%, како и на годишно зголемување кај бруто-кредитите за 470 милиони денари, односно 9%, како резултат на зголемување на кредитите од секторот домаќинства за
242 милиони денари или 6,3%, како и од растот на кредитите на стопанство за 227 милиони денари или 17,3%. Планот за бруто-кредитите на комитентите за овој период од годината е надминат за 2,9%, односно за 161 милион денари повеќе, велат од таму.
Нето-приходите од камати за овој период изнесуваат 263 милиони денари и бележат пораст од 2,7% во однос на истиот период од претходната година.
-Приходите од камати се повисоки за 9,1% во споредба со минатата година, што е резултат на поголемата кредитна активност на Банката.
Растот на каматните приходи се должи, пред сè, на зголемените приходи од секторот домаќинства и од банки и финансиски институции, при остварен раст и на приходите од камати од секторот стопанство. Во однос на планот, нето-приходите од камати се остварени со 97,1%, велат од таму.
Нето-приходите од провизии и надоместоци за услуги во анализираниот период изнесуваат 125,7 милиони денари.
-Со состојба на 30.9.2025 година, приходите од провизии бележат годишно зголемување од 4,4%, што се должи, пред сè, на зголемувањето на провизиите од кредитирање и провизиите од платен промет во земјата и во странство.
Доминантно учество во генерирањето на приходите од провизии има платниот промет во земјата со 47,8%, како и провизиите од картично работење со 34,1%. Во однос на планот, нето-приходите од провизии за овој период
од годината се остварени со 92,7%.
Останатите приходи од работењето на Банката изнесуваат 28 милиони денари и се повисоки во однос на минатата година, главно како резултат на реализирани приходи од капитална добивка од продажба на преземени средства. Во однос на планот, остварувањето изнесува со 87,8%.
Вкупните оперативни трошоци во анализираниот период изнесуваат 343 милиони денари и се за 13% повисоки во однос на истиот период минатата година, како резултат, на повисоките трошоци за плати и вработени.
Оперативните трошоци за овој период од годината се во согласност со планираното ниво, односно за 1,2% пониски.
Исправката на вредноста на финансиските средства и на посебната резерва за вонбилансна изложеност на нето-основа изнесува 5,5 милиони денари, што соодветствува со обемот, структурата и квалитетот на пласманите на Банката, велат од таму.
ПОВРЗАНИ ВЕСТИ
Како работела ТТК Банка во првото полугодие
Слаѓан Михајловски именуван за член на НО на ТТК Банка
