Македонија ќе ги укине царините за стоки од САД. Предлог-законот за измени и дополнувања на Законот за Царинска тарифа кој поминал на седница на Владата, ја содржи и таа одлука.
Детали за тоа денеска на прес-конференција соопшти министерката за финансии, Гордана Димитриеска – Кочоска.
– САД се стратешки партнери на нашата земја и соработката со нив е значајна од секој аспект поради што Владата e пoдготвена да го прошири и продлабочи блиското партнерство помеѓу двете земји што се заснова на заеднички цели, интереси и вредности и да воспостави трајна соработка врз основа на заемен интерес.
Приоритет на оваа Влада е да креираме политики со кои ќе создадеме поволно и предвидливо бизнис окружување за сите компании, вклучително и за домашните и странските компании и на таков начин да изградиме силна економија, рече таа и посочи дека по овој потег се очекува и САД реципрочно да возвратат и да бидат укинати царините за македонските производи.
Таа нема прецизни информации кога и дали САД ќе возвратат на ист начин, иако таков потег се очекувал.
