Случајот “Таргет“, кој се однесува на масовното прислушување во поранешната Управа за безбедност и контрараразузнавање (УБК), кој го отвори поранешното Специјално јавно обвинителство, застаре пред околу две години, а сега како што објави „Фокус“ пристигна “сметката“ за наплата на адвокатските услуги, која ќе треба да ја плати државата, односно граѓаните.
Како што информираат од Основниот кривичен суд Скопје за „Фокус“ за адвокатите на поранешниот прв човек на УБК, Сашо Мијалков и на другите обвинети во овој случај граѓаните ќе треба да платат 85.000 евра.
Од друга страна, пак поради застареноста на овој случај (благодарение на измените на Кривичниот законик) никогаш нема да има кривично правна разрешница и одговорност за незаконското прислушување.
Исто така, државата, освен овие трошоци, во иднина ќе треба да ги обесштети и жртвите од прислушувањето. Доколку обвинетите беа прогласени за виновни, тогаш штетата ќе требаше да ја платат тие, пишува „Фокус“.
