Новите случаи со западно-нилска треска доаѓаат од северниот и североисточниот дел на Скопје, што до сега не било забележно, информираше денеска министерот за здравство Сашо Клековски.
Тој рече дека уште еден гавран бил позитивен на западно-нилска треска, а птицата била пронајдена во Општина Карпош, во близина на Драмскиот театар, што е трет регистриран позитивен гавран.
Клековски ги повика граѓаните да не пријавуваат целосно распаднати птици, бидејќи од нив не може да се направи тестирање. Наместо тоа, апелот е вниманието да биде насочено кон мртви гаврани, особено надвор од Скопје.
Во земјава досега се евидентирани 55 случаи на западно-нилска треска, од кои 53 се лабораториски потврдени, а два се сè уште непотврдени.
Во моментов на Клиниката за инфективни болести и фебрилни состојби во Скопје се лекуваат 19 пациенти.
Досега смртноста од ова заболување изнесува 11,5%. Просечното болничко лекување трае 14 дена, при што најдолгиот престој бил 29 дена, а најкраткиот осум дена.
Најголем број пациенти на Клиниката биле регистрирани на 12. август, кога имало 24 хоспитализирани, а најголемиот број хоспитализации биле забележани во периодот од 3 до 24. август.
Меѓу пациентите има значително повеќе мажи – четири пати повеќе од жените, а сите досегашни смртни случаи се кај мажи.
Во периодот по 24. август, има помалку регистрирани случаи во споредба со изминатите три недели.
ПОВРЗАНИ ВЕСТИ
Не допирајте мртва дива птица, кои како и комарците се преносители на западно-нилска треска
Фото: Unsplash
