Денеска во Кривичниот суд Скопје започна судскиот процес за тројца полициски службеници во врска со трагедијата во т.н. дискотека “Пулс“ во Кочани.
Станува збор за Кире Богатинов, Горан Лазаров и Александар Темелков, кои се полициски службеници од Кочани.
Сите се изјаснија дека не се виновни.
Богатинов и Лазаров се обвинети за кривичното дело злоупотреба на службената положба, а Темелков за две поврзани дела – злоупотреба на службената положба и овластување.
Според Основно јавно обвинителство за гонење организиран криминал и корупција (ОЈО ГОКК), кое го отвори случајот, тие како службени лица при изготвување на записници внесувале неточни податоци и овозможиле неправилно водење прекршочни постапки. Наместо на име на активниот субјект „Пулс“, каде што биле констатирани прекршоците, тие пишувале прекршочни пријави на фирма која не е активна.
На тој начин обвинетите овозможиле противправна имотна корист за „Пулс“ и за одговорното лице Митко Стојанов.
ОЈО ГОКК поднесе обвинителен предлог против уште девет полициски службеници во врска со трагедијата. Тие исто така се товарат за злоупотреба на службената положба и овластување, но во врска со издавањето лиценци за работа на т.н. дискотека „Пулс“ во Кочани.
Почетокот на судскиот процес за овој случај е закажан за 25. март.
Исто така пред неколку денови Основниот кривичен суд Скопје го одобри и обвинителниот акт за уште 13 полициски службеници, исто така, обвинети за кривични дела поврзани со трагедијата во „Пулс“.
Почетокот на главната расправа за овој предмет сè уште не е закажана.
ПОВРЗАНИ ВЕСТИ
Судењето за дел од полицајците обвинети за „Пулс“ започнува во март
Поднесени три обвиненија и за полициските службеници за пожарот во „Пулс“ во Кочани
Фото: Игор Бансколиев
