Фондацијата „Фросина Кулакова“ информира дека добитник на стипендијата „Фросина Кулакова“ за 2026 година е Ален Милковски од Куманово.
Стипендијата е основана во чест на младата модна дизајнерка Фросина Кулакова, со цел нејзината љубов кон уметноста, креативноста и убавината да продолжи да живее преку поддршка на нови генерации талентирани млади автори.
„Во творештвото на Ален Милковски, Комисијата препозна искреност, зрелост и длабока чувствителност – вредности што ја надминуваат уметничката форма и зборуваат за човекот зад делото. Неговата работа, која ги опфаќа цртањето, пишувањето и креативното изразување, отвора теми за ранливоста, болката, надежта и човечката сила, потсетувајќи дека уметноста не е само естетика, туку и простор за разбирање, сочувство и промена.
Посебно значење за Фондацијата има тоа што дел од неговата инспирација произлегува и од приказната на Фросина, преточена во искрена порака за поголема свест, одговорност и грижа за човечкиот живот,“ велат од Фондацијата.
Стипендијата ќе биде свечено доделена денеска (25. јуни), денот кога Фросина требаше да го прослави својот 24. роденден.
„Наместо роденденска прослава, овој ден повторно ќе биде ден на надеж – ден кога преку еден млад човек ќе продолжи да живее нејзината љубов кон модата, уметноста и создавањето.
Фондацијата му честита на Ален Милковски и му посакува неговиот творечки пат да продолжи со истата искреност, храброст и посветеност. Веруваме дека неговиот уметнички глас ќе продолжи да отвора важни општествени прашања и да инспирира нови генерации.
Воедно, Фондацијата изразува искрена благодарност до сите кандидати кои аплицираа на овогодинешниот конкурс. Секоја апликација носеше своја приказна, талент и визија, а изборот беше исклучително тежок. Комисијата имаше привилегија да се запознае со млади луѓе чија креативност потврдува дека иднината на македонската уметност има силна, храбра и инспиративна генерација,“ велат од таму.
Фондацијата „Фросина Кулакова“ останува посветена на својата мисија – да ги поддржува младите таленти и да ја афирмира уметноста како простор каде што се раѓаат надежта, емпатијата и општествената одговорност.
Секоја доделена стипендија е повеќе од признание. Таа е доказ дека талентот, добрината и љубовта што Фросина ги носеше во себе продолжуваат да живеат – претворени во можност за нечија иднина.
Промотивна објава
