По успешната реализација на кампањата во ротаријанската 2025/2026 година, Ротари клуб Скопје Вест и ова лето ја продолжува иницијативата „Една искра, цела шума! Не пали, чувај!“, со цел да ја поттикне јавната свест за причините, последиците и превенцијата од шумските пожари.
Минатата ротаријанска година кампањата беше реализирана со поддршка на Сојузот на Ротари клубови на Македонија и Ротари Дистрикт 1912, насочена кон поттикнување на одговорно однесување и превентивно дејствување во периодите на зголемен ризик од пожари.
Покрај едукативната и превентивната компонента, кампањата беше надградена и со конкретна поддршка за противпожарните служби. Во рамките на иницијативата беше донирана современа противпожарна опрема на Територијалната противпожарна единица во Берово, како поддршка за пожарникарите кои секојдневно ги штитат граѓаните и природните богатства.
Како дел од оваа поширока иницијатива, а во духот на ротаријанската солидарност, беше обезбедено и специјализирано теренско противпожарно возило за Доброволното противпожарно друштво во Пехчево. Проектот го реализираше Ротари клуб Скопје Вест со донација и поддршка од словенечките Ротари клубови. Возилото, вредно околу 18.000 евра, е целосно приспособено за интервенции на тешко пристапни ридско-планински терени и претставува значајно зајакнување на локалните капацитети за справување со шумските пожари.
Овие активности потврдуваат дека успешната превенција не се темели само на подигнување на јавната свест, туку и на конкретна поддршка на оние кои секојдневно се на првата линија во заштитата на луѓето, шумите и животната средина.
Во текот на летниот период, Ротари клуб Скопје Вест повторно ќе ги објавува едукативните материјали од кампањата на своите социјални мрежи и ги повикува медиумите, институциите, организациите и граѓаните да се приклучат преку нивно споделување. Само со заедничко информирање, одговорно однесување и навремена превенција можеме да придонесеме за намалување на ризикот од шумски пожари и за зачувување на нашите природни богатства.
Промотивна објава
