Денеска започна изградбата на 400 kV далекувод од ТС „Битола 2“ до македонско-албанската граница.
Станува збор за капитален проект кој ја заокружува електроенергетската поврзаност на Македонија со сите соседи и ја зацврстува позицијата на земјата како доверлив партнер во регионалната енергетика, информираа од Министерството за енергетика, рударство и минерални суровини.
Со интерконективниот далекувод се засилува преносната мрежа и се зголемува капацитетот, а 51,2% од опремата е веќе обезбедена и ќе биде користена од новоизбраниот изведувач.
Проектот опфаќа изградба на далекувод со должина од 97,5 километри на македонска територија, поставен на 269 челично решеткасти столбови, трансформаторска станица во близина на Охрид и далекуводно поле во ТС “Битола 2“, со рок на извршување од 30 месеци.
Проектот е финансиран и поддржан од меѓународните партнери, меѓу кои и Европската банка за обнова и развој (ЕБОР) и Европската унија, и е примарен дел од регионалниот енергетски Коридор 8.
Фото: Министерство за енергетика
