Претседателот на ГРОМ, Стевче Јакимовски, доброволно заминал на издржување на затворската казна, соопштија од партијата, оценувајќи дека судот не ја земал предвид неговата здравствена состојба.
Од ГРОМ наведуваат дека Јакимовски е онколошки пациент и дека неодамна бил подложен на оперативен зафат, поради што одлуката да биде испратен на издржување на казната ја оценуваат како нечовечна и политички мотивирана.
Партијата тврди дека пресудата се однесува на поставување две времени општински бараки, кои, според нив, 13 години биле во функција на граѓаните и ѝ заштедиле значителни средства на Општина Карпош. Во соопштението се упатуваат и обвинувања за селективна правда и политички притисок врз Јакимовски.
Апелацискиот суд Скопје претходно ја потврди првостепената пресуда со која Јакимовски е осуден на една година затвор за кривичното дело бесправно градење. Во казната му се пресметува и времето што го поминал во куќен притвор од март до август 2019 година.
