Тајните на јапонската кујна и егзотичните вкусови на Далечниот исток, ќе бидат претставени на Јапонска вечер, што ќе се одржи во Limak Skopje Luxury Hotel на 25. октомври годинава, информираат од таму.
Земјата која се одликува со големи контрасти, специфична култура, уникатна природа и богата традиција, овој пат беше инспирација за организација на една од познатите вечери на Limak Skopje Luxury Hotel.
Од изобилството гастрономски задоволства што ги нуди јапонската кујна, тимот на искусни и вешти готвачи на хотелот за вечерта посветена на јапонски специјалитети одлучи да подготви јапонска крем супа чаванмуши (chawanmushi), крокети од говедско месо короке (korokke) и пржено пилешко месо на јапонски начин (karaage). Десертот е чизкејк од јапонски зелен чај мача.
Типичните јапонски јадења ќе бидат придружени со карактеристични јапонски пијалаци, како саке, додека автентичната јапонска музика ќе го комплетира амбиентот за уживање во јапонска храна.
Во традиционалната јапонската кујна преовладуваат ориз, зеленчук и риба, додека помалку се консумираат црвено месо и млечни производи. Соја-сосот е редовен придружник на јадењата, а поради својата уникатност, јапонската традиционална кујна е дел од репрезентативната листа на УНЕСКО за културно наследство.
Јапонската вечер ќе се одржи на 25. октомври со почеток во 20.30 часот во Clover ресторанот на петтиот кат на Limak Skopje Luxury Hotel, каде можат да се добијат сите дополнителни информации.