Против американскиот рапер Шон Диди Комбс, кој е во затвор откако минатиот месец беше уапсен за бројни кривични дела, од трговија со луѓе до рекетирање, силување и киднапирање, има најави за тужби од 120 нови лица, а бројката може да стигне дури до 3.000 тужби, пренесуваат американските медиуми.
Новите тужби се за за сексуален напад, силување и сексуална експлоатација, а од нив половина се од мажи.
Според американските медиуми некои од тужбите наводно се за случаи во кои се инволвирани 25 малолетници, со што раперот за првпат се соочува со можноста за обвинувања за сексуално злоставување деца.
Најголем дел од тужителите велат дека биле силувани по т.н. бели забави организирани од Комбс во приватни резиденции и хотели.
Обвинувањата временски се протегаат од 1991 година до годинава.
Правната застапничка на Комбс, Ерика Волф изјави дека тој категорично ги негира обвинувањата, велејќи дека се лажни и клеветнички.
Тони Базби, адвокат од Тексас, САД, кој ќе ги застапува новите тужители изјави дека неговиот тим има „собрано слики, видеа, текстови“ и дека ќе ги разоткријат оние кои го овозможиле ова однесување зад затворени врати повеќе децении.
На интернет веќе на големо се појавуваат бројни фотографии и видео од забавите на Комбс, на кои присустувале светската музичка и филмска елита од Џенифер Лопез (со која беше во врска), Бионсе, Џеј Зи, Џастин Бибер, Мараја Кери до Леонарди Ди Каприо.
Дали тие знаеле што навистина се случувало, дали ќе бидат повикани како сведоци на престојното судење и дали овој случај ќе има сериозен удар врз нивните кариери ќе биде јасно наскоро.
Видео: WatchMojo.com