Во организација на ИСОС – Институтот за сметководители и овластени сметководители, на 3. април 2025 година во Скопје, ќе се одржи втората регионална конференција на сметководители и овластени сметководители, под мотото: „Нова ера во сметководството – Стандардите како предизвик, технологијата како сојузник“, информираат од таму.
На конференцијата се очекува да земат учество околу 500 сметководители и овластени сметководители од земјава и регионот, како и претставници од релевантни домашни и меѓународни институции, организации, од академската заедница и деловниот сектор.
Главната цел на конференцијата е отворање на дијалог за иднината на сметководствената професија, преку адресирање на предизвиците поврзани со усогласување со Меѓународните стандарди за финансиско известување (МСФИ), воведувањето на ЕSG принципите во финансиското известување, како и интеграцијата на новите технологии – особено вештачката интелигенција и анализата на големи податоци – во секојдневната работа на сметководителите.
Во рамки на конференцијата ќе се одржат панел-дискусии и презентации на добри практики, на кои учество ќе земат претставници од Светска банка, Европската банка за обнова и развој, Организацијата на даночни советници на Европа, Македонската банкарска асоцијација, Македонската берза, како и домашни практичари и млади професионалци.
Програмата на конференцијата вклучува и дискусија со новата генерација сметководители – идни лидери во професијата, на која ќе учествуваат студенти од катедрата за сметководство и ревизија на Економскиот факултет при УКИМ.
Конференцијата ќе ја отвори претседателката на ИСОС, Весна Прентоска.
Со оваа конференција ИСОС продолжува да ја зацврстува својата улога како клучен фактор во професионалниот развој на сметководителите и унапредувањето на стандардите и квалитетот на сметководствените услуги во нашата земја.
Агендата на конференцијата е достапна на веб-страницата на ИСОС – www.isos.mk