Општина Центар поднесе иницијатива до ЗЕЛС со која бара под итно да се донесат законски измени со цел да се спречи понатамошна ескалација на вандализмот.
Во иницијативата се побарало од ЗЕЛС да ја достави иницијативата до сите надлежни институции, Влада, МВР, Министерство за труд и социјална политика, Центрите за социјална работа, Министерство за правда, МОН, Служби за пробација, надлежните судови, НВО за да се формира работна група од која ќе произлезат законски измени за оваа негативна општествена појава.
„Бараме под итно сите надлежни да седнат на иста маса. Мораме заедно да ги разгледаме сите можности за законски и други начини како да се справиме со вандализимот на малолетните лица кои се почесто предизвикуваат инциденти со кои се нарушува безбедноста.
Во исто време може да дојде и до поголема трагедија во која овие малолетни лица и можат и самите да се повредат и да настрадаат. Превенцијата е најважна во вакви ситуации, и затоа е потребно сите овие институции да бидат присутни на терен, да се зголеми безбедноста и редовните патроли на полицијата на критичните точки во општината и во градот каде имаме сериозни инциденти,” порача градоначалникот на Општина Центар, Горан Герасимовски.
Вчера во населбата Капиштец повторно се случи инцидент во кој малолетни лица кршеа шишиња, фрлааа петарди и предизвикуваа тепачки.
Ова не е прв ваков настан во населбата. На средината на ноември, група малолетници обија багер, а претходно беше обиен и ограбен комуналниот пункт во истиот реон.
Општина Центар предлага законски измени не само во делот на зголемување на казните за оштетување урбана опрема, туку и воведување општествено одговорна работа каде што би се вклучиле и децата и родителите за да се подигне свеста за оваа појава.
„Наша цел е со воведување на оваа мерка да ги ангажираме родителите да поведат сметка за своите деца и заедно со нив да поработат на нивното однесување и воспитување, бидејки семејство и домот е најважната алка во решавање на овој проблем”, додава Герасимовски.
ПОВРЗАНИ ВЕСТИ
(Фото) Малолетници во Капиштец обиле багер и оштетиле автомобил и систем за наводнување
Дивеење, сообраќаен хаос, гласна музика: Зголемено присуство на полиција во Капиштец и Дебар Маало