Заменик-министерката за здравство Маја Манолева, за случајот со Леонид Индов, вели дека прво треба да се испочитува здравствениот систем тука, да се исцрпат сите можности, и дури потоа да се упатат на лекување или на рехабилитација во странство.
Според нејзе „ние имаме здравствен систем кој во последните години во однос на апаратурата, во однос на опременоста е навистина напреднат“.
„Треба и да се предложи и до Собранието некаква измена за она што значи можност откако ќе бидат исцрпени сите можности во нашата земја за лекување, пациентите да бидат упатени за лекување или за рехабилитација.
Треба да се консултираат правни лица на оваа тема, треба да се провери дали треба да се сменат законските услови или треба да се смени Законот за здравствено осигурување или треба да се направи промена со правилник на Фондот,“ изјави Манолева.
Таа вели дека родителите на Индов не побарале никакво мислење од соодветните институции за можноста или неможноста за завршување на лекувањето, односно рехабилитација на тоа дете во нашите установи.
„Треба прво да се изоди тој пат, па потоа да ја прегледаме целата медицинска документација, да го видиме клинички пациентот и потоа стручниот колегиум да даде свое мислење дали има или нема можност за продолжување на лекувањето и рехабилитацијата во нашите институции“, рече Манолева.
ПОВРЗАНИ ВЕСТИ