На 28. ноември, четврток, од 19:19 часот, во Културно-информативниот центар – Скопје, ќе се одржи промоција на последниот објавен книжевен препев на Драги Михајловски – најновото еднотомно издание на ТРИ од поезијата на Руми, „Големата црвена книга“.
Џелаледин Мевљана Руми е еден од најголемите, најчитаните и најтолкуваните поети во светот. Неговите стихови претставуваат непроценливо светско наследство и досега се препеани од повеќе македонски преведувачи и поети.
Меѓу нив, освен познатиот препев на Драги Михајловски, се вбројува и Ана Пејчинова, која ќе биде промотор токму на ова дело. Заедно со Ирена Јурчева, која е втората говорничка на настанот, и Виолета Танчева-Златева во улога на модераторка, таа ќе зборува за поезијата на Руми и ќе се обиде да проникне во длабочините на овој препев.
„Добрата поезија е над сите граници и не може да биде ограничена ни од религијата ни од времето“, се вели во предговорот на ова издание, а меѓу кориците на оваа книга е собрана токму таква поезија.
Влезот е слободен и поканет е секој кој умее во поезијата на Руми да ги препознае портите за надминување на материјалните граници на постоењето.
Промотивна објава