еМагазин
Image default
Бизнис

Бројот на претставки од незадоволни осигуреници зголемен за 56 отсто, велат од Агенцијата за супервизија на осигурување

За првите три месеци годинава до Агенцијата за супервизија на осигурување (АСО) се поднесени 36 претставки од осигуреници кои не се задоволни од работата на осигурителните друштва од кои купиле полиси за осигурување.

„За 56 отсто е зголемен бројот на претставки поднесени од осигуреници незадоволни од услугите на компаниите од кои купиле полиси за осигурување, покажуваат официјалните податоци на Агенцијата за супервизија на осигурување (АСО) за првите три месеци годинава.

Согласно со Законот за супервизија на осигурување секој осигуреник има право да поднесе претставка до АСО доколку е незадоволен од работата на компанијата од која ја купил полисата за осигурување,“ велат од АСО.

За периодот јануари – март осигурениците поднеле вкупно 36 претставки против осигурителни друштва наспроти 23 претставки поднесени во истиот период лани.

„Од поднесените претставки АСО во четири случаи одлучил во корист на осигурениците кои биле подносители на претставки, за 17 предмети постапката е во тек, а за две претставки е утврдено дека се поднесени без основ за постапување.

Во девет случаи причина за претставката била висината на понудениот надоместок за компензација на настанатата штета. Тие претставки не се процесирани затоа што АСО не одлучува за висината за понудениот надоместок за штета. Во корист на компаниите се решени три од сите поднесени претставки,“ се додава во соопштението.

Во првите три месеци претставки поднеле 30 физички лица и шест правни лица.

„Од аспект на видот на осигурување најмногу претставки – 13 се поднесени за штети од автоодговорност (задолжително осигурување). За оштетни побарувања покриени со осигурување од незгода биле поднесени 10 претставки, а пет се однесуваат на незадоволни осигуреници од осигурување имот. Три претставки се за осигурување живот, а по една за патничко осигурување, каско осигурување и земјоделско осигурување.

Најмногу осигуреници вкупно 13 се жалеле на основот за исплата на штета. Деветмина на висината на понудениот надоместок, четворица реагирале на обработката на штетата, по една претставка има за рок на плаќање, одговор по приговор и висина на регрес. По останати основи се поднесени пет претставки,“ додаваат од АСО.

Во делот на осигурувањето неживот за „Уника“ се поднесени осум претставки, седум претставки има за „Винер неживот„, пет за „Граве неживот“, по две за „Халк Осигурување“, „Евроинс“ и „Еуролинк“.

По една претставка е стигната за: „Сава“, „Триглав“, „Кроација неживот“, „Осигурителна полиса“ и за Националното биро за осигурување. Од компаниите за осигурување живот за „Кроација осигурување живот“ има три претставки. Во овој период нема претставки за „АДОР Македонија“, „Граве живот“, „Уника живот“, „Триглав живот“ и „Винер живот“.

Претставка до АСО се поднесува ако осигуреникот не е задоволен од одговорот на компанијата за оштетното побарување или не добил одговор во рок од 30 дена. АСО не разледува анонимни претставки или случаи за кои се води судска или друга постапка.

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Народна банка: Основната каматна стапка останува на ниво од 1,25%

Редакција

Андреја Јосифовски купи акции во Макпетрол

Редакција

Струмичко “Единство“ избришано од Листата за набљудување на Македонската берза

Редакција