Поради честите прекини на електрична енергија и лошите временски услови Специјалната болница за превенција, лекување и рехабилитација – Отешево нема да работи во наредните неколку денови.
Директорката на болницата, доктор Александра Пили информира дека деновиве екипи прават тестирање на пумпите за довод на вода, по што ќе продолжат со редовни амбулантски прегледи и хоспитализација на пациенти.
– Поради лошите временски услови и прекинот на електрична енергија, не работат пумпите за довод на вода, а со тоа нема услови нормално да функционира болницата. Хоспитализираните пациенти од саботата соодветно се транспортирани до своите домови.
Правиме тестирање на парното и доводот на вода и во наредните денови се надеваме дека ќе почнеме со редовните амбулантски прегледи и хоспитализација на пациенти, изјави Пили за МИА.
Сите закажани прегледи, нагласи, времено се одлагаат, за што пациентите соодветно ќе бидат информирани.
– Штом ќе ги санираме последиците од невремето во најкус можен рок ќе продолжиме со редовната работа, а пациентите соодветно ќе ги информираме, рече директорката.
Најголем дел од хоспитализираните пациенти биле од Ресен, но имало и од Битола и од Скопје.
МИА/Фото: Архива/МЗ