Премиерот Христијан Мицкоски ѝ порача на бугарската потпретседателка Илијана Јотова, наместо тие да ни даваат совети за почитување на човекови права, Бугарија да ги почитува правата на македонската заедница таму.
„Имаме 14 пресуди за македoнската заедница во Бугарија. Ги повикувам истите овие кои што нас ни даваат совети, да ги советуваат и бугарските власти, да ѝ дозволат на македонската заедница барем да се организира во невладини организации.
Не бараме да бидеме дел од Уставот, туку да се организираат во невладини организации,“ одговори Мицкоски на изјавата на Јотова која од трибина во Ќустендил насловена како „Бугарите на Балканот надвор од границите по 1878 година“, ги потсети македонските власти дека ако не ги почитуваат човековите права, може да преговара до бескрај со Европската Унија (ЕУ).
„Би сакала да ги повикам моите колеги од Република Северна Македонија да ги читаат европските вредности со поголемо разбирање, бидејќи тогаш, кога ќе започнат вистинските преговори за пристапување во ЕУ, постои едно главно прво поглавје – „Основни права“.
Овие права минуваат низ целиот преговарачки процес и ако има барем една земја која верува дека не се почитуваат човековите права, особено оние на претставниците на различни народи и народи, овој процес никогаш нема да заврши,“ кажа Јотова.
ПОВРЗАНИ ВЕСТИ
Бугарија не им дозволува на Македонците да ја одбележат годишнината од Кресненското востание
Во Бугарија не постои свест за правата на малцинствата: Нова критика на Советот на Европа
Бугарија од 2006 не спровела ниту една одлука на Судот за човекови права за македонското малцинство
Фото: Влада