Доцна синоќа на локалниот пат Тетово – с. Непроштено патничко моторно возило удрило во млада мечка која го минувала патот заедно со една значително поголема мечка и уште две помали мечки, информираат од Центар за управување со кризи (ЦУК).
„Во возилото кое удрило во мечката се наоѓало локално семејство, татко, мајка и три мали деца. Од ударот децата се здобиле со лесни повреди.
Мечката во која удрило возилото била повредена, на почетокот безмалку неподвижна, а потоа со ограничени движења.
Околу еден час подоцна почнала да се движи и постепено се оддалечила од местото на несреќата.
Веднаш откако на бројот 112 е пријавено за сообраќајна несреќа во која е повредена мечка, ЦУК испрати известување до сите потенцијално надлежни институции, МВР, Државен инспекторат за шумарство и ловство, Министерство за животна средина и просторно планирање, Министетство за земјоделство, шумарство и водостопанство, Факултет за ветеринарна медицина при УКИМ, Ветеринарен институт, Агенција за храна и ветеринарство, Зоолошка градина Скопје, Националниот парк Шар Планина и Македонско еколошко друштво.
Екипи на МВР извршија увид и го обезбедија местото на несреќата,“ се вели во соопштението.
Фото: ЦУК