Специјалното обвинителство во Хаг го обвини косовскиот претседател Хашим Тачи и уште девет други поранешни борци на ОВК за злосторства против човештвото и воени злосторства.
Тие се товарат за сто убиства, киднапирања, прогон и мачење за време на војната на Косово во периодот 1998-1999 година.
„Жртвите на кривични дела од обвинението се стотици лица чиј идентитет е познат и меѓу нив се косовски Албанци, Срби и Роми, како и политички противници.
Обвинението е резултат на долготрајни истраги и го одразува уверувањето на обвинителството дека може да ги докаже вон разумен сомнеж сите обвиненија содржани во неа“, соопшти обвинителството во Хаг.
Меѓу обвинетите е и Кадри Весели, поранешен претседател на Собранието на Косово и лидер на Демократската партија.
Хашкото обвинителство соопшти дека Весели и Тачи терале кампања и правеле се што можат да ја оспорат работата на обвинителите и да ја укинат оваа институција.
Доколку судот во Хаг ги прифати обвиненијата, овој случај допрва ќе се развива во судската постапка.