Владиката Пимен, митрополит на Европската епархија на МПЦ – ОА, на неговиот Фејсбук-профил сподели статус кој за Денот на независноста на Македонија го напишал лани, но се уште е актуелен според неговото значење.
„И додека славиме денес, убаво би било да размислиме како тоа сите толку многу ја сакаме Македонија, а толку многу се мразиме како Македонци меѓусебно. Да се сетиме дека посакувајќи му зло на другиот, Македонија нема да стане поубаво, туку попразно место за живеење.
И кога ќе се впуштиме повторно во она судење кој има, а кој нема право да се нарекува Македонец и да слави и честита ден на независност, не заборавајте дека националното чувство е лична определба, а не одлука на некоја патриотска комисија која треба да издава сертификати за подобност да се биде голем или мал Македонец или воопшто да се биде Македонец.
Честит и вековит да ни биде овој ден! Биди ми вечна татковино, биди ми вечна Македонијо,“ пишува Отец Пимен во неговата порака.
фото: МПЦ