Поранешниот министер за транспорт и врски, Миле Јанакиески, тврди дека не е виновен за тоа што е оштетен буџетот за повеќе од милион евра во случајот „Топлик„, пренесува Телма.
Тој на денешното рочиште, како што пренесува телевизијата, рече дека долго чекал на одбраната која ја подготвува три години, а за која зборуваше повеќе од три и пол часови.
Јанакиески тврди дека не ја распуштил првата и не формирал втора комисија со намера да реализира оглас со недостатоци за да се продаде земјата кај Сончев град. Ниту пак вели дека како министер би можел да знае дека подоцна продажбата ќе пропадне, а буџетот ќе биде оштетен за повеќе од милион евра.
Случајот „Топлик“ на поранешното Специјално јавно обвинителство е отворен во 2016 година и е поврзан со спорната продажба на елитното земјиште на Водно. Според Обвинителството и покрај тоа што Јанакиески знаел дека има недоследности во огласот, влијаел за да се распише огласот кој подоцна пропаднал, а државата имала загуби.
Фото: Јанакиески/Фејсбук