Погрешни се информациите кои излегоа на некои од порталите и на социјалните мрежи дека е покачен курсот на еврото, реагираат од Народна банка.
„Во објавите се прави забуна помеѓу курсната листа за вршење на платен промет со странство за потребите на државните органи, со средниот курс кој е релевантен податок за вредноста на валутите.
Девизниот курс на денарот е стабилен и нема промени во неговото ниво. Средниот курс на еврото според курсната листа на Народната банка изнесува 61,69 денари и истиот е непроменет во однос на лани.
Во ова може секој да се увери доколку ја посети веб-страницата на Народната банка, каде секој ден се објавуваат овие податоци nbrm.mk и која е единствен релевантен извор на информации според којшто населението и фирмите може да го следат девизниот курс на домашната валута.
Таа ги отсликува цените на валутите од реалните тргувања на домашниот девизен пазар,“ се вели во соопштението.
Во него се додава дека Народната банка располага со низа инструменти со коишто ја гарантира стабилноста на денарот во однос на еврото.
Девизните резерви коишто се клучни за одржување на стабилноста на курсот на домашната валута се на високо ниво – двојно повисоко од пред глобалната економска криза во 2008 година.