Владата ја разгледа Информацијата пристигната од АД „Водостопанство на Република Северна Македонија“ со план за активности за зголемување на приходите за 10 проценти и намалување на расходите за 20 отсто, откако на една од претходните владини седници било упатено барање за појаснување околу утврдувањето на зголемувањето на надоместокот на услугите и било упатено барање за ревидирање на платите до ова акционерско друштво.
Како што соопшти владината Прес-служба, на седницата бил донесен заклучок со задолжување Управниот одбор да го раскине менаџерскиот договор со директорот и во иднина сите нови договори да се склучуваат со претходна согласност со Министерството за финансии.
– Надоместоците за членовите на Управниот одбор во наредните 12 месеци да се намалат за 50 проценти. Во насока на намалување на расходите, Владата го задолжи АД „Водостопанство“ да ги намали капиталните инвестиции во износ од 100 милиони денари со што се намалува финансискиот план за износот кој што е предложен од нивна страна, се додава во соопштението.