Во чест на Илинден, основаме две нови национални установи поврзани со афирмација на настани и личности значајни за илинденскиот период и за македонската државност, информираше премиерот Димитар Ковачевски.
„Владата на денешната седница донесе одлуки за основање Центар за култура „Десет дена Крушевска Република“ и Манифестација „Денови на Смилевскиот конгрес“.
Преку Центарот за култура „Десет дена Крушевска Република“ во Крушево ќе поттикнуваме творештво на современиците, инспирирано од Илинден и борбата на македонскиот народ за национално ослободување и за афирмација на нашата држава.
Манифестацијата „Денови на Смилевскиот конгрес“ ќе биде сместена во некогашната куќа на револуционерот Даме Груев во село Смилево и ќе ги одбележува деновите на Смилевскиот конгрес, како историски настан од значење за македонскиот народ.
Овој Конгрес е длабоко врежан во свеста на македонскиот народ за значајниот период на поставувањето на темелите на македонската државност,“ вели во објавата на Фејсбук, Ковачевски.
Фото: Влада