Поради забавување на инфлацијата, Европската централна банка (ЕЦБ) ги намали трите клучни каматни стапки за 25 базични поени, па така депозитната стапка сега е 2,5%, каматната стапка на операциите за главно рефинансирање е 2,65%, а каматната стапка на маргиналните кредити е 2,9%.
„Монетарната политика станува значително помалку рестриктивна,“ изјави претседателката на ЕЦБ, Кристин Лагард.
Таа оцени дека и покрај олабавување на монетарната политика, ризици за поттикнување на инфлацијата се уште постојат, како што се трговските војни и повеќе одбранбени трошоци.
Банката предвидува дека просечната инфлација во еврозоната ќе биде 2,3% и ќе падне на 1,9% во 2026 година, пред малку да се зголеми на 2% во 2027 година.
Прогнозата за 2025 година е ревидирана нагоре во однос на претходната проценка, како одраз на посилна динамика на цените на енергијата.
Европската централна банка очекува базичната инфлација во еврозоната да биде 2,2% во 2025 година и да падне на 2% во 2026 година и 1,9 отсто во 2027 година.
Прогнозите за економски раст на еврозоната се ревидирани надолу на 0,9% за 2025 година и 1,2% за 2026 година, како одраз на слабиот извоз и инвестиции.
Банката очекува економијата на еврозоната да порасне за 1,3% во 2027 година.
Примената на новите каматни стапки ќе започне на 12. март.
Фото: Unsplash