еМагазин
Image default
Свет ТОП СТОРИИ

Богатите држави од Г7 им „должат“ на сиромашните 13 трилиони долари

Богатите и индустријализираните земји од Г7 им должат на сиромашните земји околу 13 трилиони долари неплатена помош за развој, како и поддршка во борбата против климатските промени, процени хуманитарната организација Оксфам.

Наместо да ги исполнуваат своите обврски, земјите од Групата седум и нивните банки бараат отплата на долг од 232 милиони долари дневно, објави Оксфам денеска пред самитот на Г7 кој ќе се одржи од петок до недела во Хирошима, Јапонија.

– Богатите земји од Г7 сакаат да се прикажуваат како спасители, но спроведуваат смртоносен двоен стандард – тие играат според еден сет на правила, додека нивните поранешни колонии се принудени да играат според друг, рече привремениот извршен директор на Оксфам, Амитаб Бехар.

– Богатиот свет е тој што му должи на Глобалниот југ. Помошта што ја ветија пред неколку децении, но никогаш не ја дадоа. Огромните трошоци од климатските штети предизвикани од нивното несовесно согорување на фосилни горива. Огромното богатство изградено на колонијализам и ропство, додаде тој.

Оксфам соопшти дека самитот се одржува во време во кое се кратат платите на работниците, драстично се зголемуваат цените на храната и расте гладот во светот, пренесе ДПА.

За прв пат во 25 години, екстремното богатство и екстремната сиромаштија истовремено се зголемуваат, додава организацијата.

Земјите од Г7 го прекршија ветувањето дека ќе даваат 100 милијарди долари годишно за да им помогнат на посиромашните земји да се справат со климатските промени, потсетува Оксфам, додавајќи дека се проценува дека нивните емисии на јаглерод предизвикале загуби и штети од 8,7 трилиони долари во земјите со низок и среден приход.

Во 1970 година богатите земји ветија дека годишно ќе даваат 0,7 отсто од економското производство за развојна помош. Но, не беа обезбедени 4,49 трилиони долари, што е повеќе од половина од ветувањето.

– Тие пари можеа да направат разлика, нагласи Бехар.

Можеше да плати за школување на децата, болници, лекови за спасување животи, пристап до вода, како и подобра инфраструктура, земјоделство и безбедност на храна и многу повеќе, додаде тој.

– Г7 мора да ги плати своите долгови. Ова не е за добра волја или за добротворни цели – тоа е морална обврска, истакна Бехар.

МИА/Фото: Унсплеш

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Во карантин ќе одат македонските граѓани кои од 1.септември за влез во земјава ќе немаат ПЦР-тест, потврда за вакцина или прележан Ковид-19

Редакција

Одземена лиценцата на „Беса Травел“

Редакција

(Галерија) Македонија доби „Премиум“ деловен центар: Како изгледа

Редакција