Белорусија вчера присили авион на Рајанер принудно да слета во главниот град Минск, а тамошните власти на аеродромот го уапсија опозицискиот новинар Роман Протасевич, основач на медиумот „Некста“.
Информацијата за неговото апсење ја потврди Управата за борба против организиран криминал и корупција на Министерството за внатрешни работи во Белорусија, пренесуваат светските агенции.
Авионот на Рајанер, кој после неколку часа продолжи кон својата крајна дестинација, летал од Атина до Вилнус, Литванија.
Властите во Белорусија го принудиле авионот да слета во Минск поради наводно присуство на експлозив, но по слетувањето во авионот не е пронајдено ништо.
Наредбата за принудно слетување на авионот, како што пренесуваат светските медиуми, стигнала лично од белорускиот претседател Александар Лукашенко, кој наредил авионот кој бил во близина со границата со Литванија, веднаш да се заврти и да се спушти во Минск, а за придружба бил испратен и воен авион.
Од бројни членки на Европската Унија (ЕУ) стигна осуда за овој инцидент, а се очекува денеска за истиот да дискутираат лидерите на ЕУ.