Иселените Срби од Ѓаковица кои денеска најавија дека ќе го чествуваат празникот Успение на Пресвета Богородица во тамошниот манастир, се откажаа од намерата по големиот протест на локалните Албанци, јави дописникот на МИА од Приштина.
Веста за Косовска телевизија (КТВ) ја потврди портпаролот на полицијата во Ѓаковица, Крист Ѓокај, но и претставници на иселените Срби во изјави за српските медиуми.
Претседателот на Здружението на иселени Срби од Ѓаковица, Ѓокица Станојевиќ за Радио телевизија Србија (РТС) изјави дека се откажале од посетата на тамошниот манастир затоа што не сакаат да влезат во „круг на омраза и тензии“.
– Не сакаме инциденти. Овој пат не се понижени Србите, понижени се меѓународните институции, институциите во Приштина, невладините организации, кои не се способни ниту по 20 години да им обезбедат на Србите во Ѓаковица мирно, достоинствено, да ги одбележат своите празници, крштевките, Божик, Велигден, изјави Станојевиќ.
Албанците од утрово протестираат во близина на православната црква во Ѓаковица, со пароли и пораки дека „нема да им дозволат на злосторниците“ да се вратат во нивниот град. Тие не им веруваат на официјалните лица кои ги информираа дека посетата на Србите е откажана и го продолжуваат собирот пред црквата.
Тачи им вети на мајките од Ѓаковица дека злосторниците никогаш нема да се вратат во Косово
Косовскиот претседател Хашим Тачи им изрази поддршка на мајките од Ѓаковица во нивните барања за правда за убиените во војната од 1998-99, порачувајќи им дека „тоа што го доживеаја косовските граѓани нема да биде заборавено“ и дека сторителите на злосторства никогаш нема да се вратат во Косово, јави дописникот на МИА од Приштина.
Во одговорот на отвореното писмо на Здружението на мајките од Ѓаковица, кои побараа од него да ги спречи српските верници да дојдат на чествување на Голема Богородица во тамошниот манастир, Тачи напиша на Фејсбук дека сочувствува со болката на мајките кои ги загубија своите најмили.
– Ги уверувам нив и сите косовски мајки, како и сите граѓани на Косово, дека злосторниците и убијците кои извршија злосторства, никогаш не ќе можат да се вратат во нашата земја. Каде и да се, тие нема да бидат мирни, се додека не поднесат сметка пред правдата. Ние никогаш нема да заборавиме што сме доживеале, напиша Тачи.
Косовскиот претседател во истата порака побара од сонародниците да бидат толерантни и да имаат разбирање, но додаде и дека ќе ги разбере доколку постапат поинаку.
– Со најголема почит Ве повикувам на толеранција и разбирање. Но, и доколку постапите поинаку еднакво ве разбирам и почитувам. Мајката е мајка секаде во светот, независно од етничката или верската припадност. Таа им потреба да пушти солзи и да положи цвеќе на гробот на својот син, ќерка, сопруг, сестра, внук или внука. Истото право го има и еден татко, брат или сестра, напиша Тачи.
Претходно, во одговор на отворено писмо на срската хуманистка Наташа Кандиќ, косовскиот претседател порача дека ќе стори се за да им се овозможи на Србите да го посетат манастирот во Ѓаковица.
МИА/Фото: onamonamo.wordpress.com