На Министерскиот состанок за енергетика во Софија се формираше новата регионална платформа на ЕУ за набавка на гас, откако Газпром прекина да ја снабдува Бугарија, која ќе ги вклучи и земјите од Западен Балкан.
Во оваа платформа свое учество има и Македонија, информираат од Министерството за економија.
Новата регионална платформа во рамки на сеопфатната платформа на ЕУ има за цел да се справи со регионалните потреби за гас и струја, инфраструктурата, цените и намалувањето на зависноста од руските извори на енергија.
Софиската платформа ќе ги координира плановите во регионот, меѓународните набавки, залихи, поврзаност и со тоа ќе придонесе за енергетска безбедност во регионот, велат од министерството.
На министерскиот состанок кој е во организација на Министерството за енергетика на Бугарија, покрај министерот за економија Крешник Бектеши и домаќинот, министерот за енергетика на Бугарија, Александар Николов учествуваа и Дите Јоргенсен, генерален директор на Директоратот за енергија на Европската комисија (ДГ ЕНЕР), Константинос Скрекас, министер за енергетика и животна средина на Грција, Виргил Даниел Попеску, министер за енергетика на Романија, Зорана Михајловиќ, вицепремиер и министер за рударство и енергетика на Србија, Парвиз Шахбазов, министер за енергетика на Азербејџан, Герман Галушченко, министер за енергетика на Украина, како и Алпарслан Бајрактар, заменик- министер за енергетика и природни ресурси на Турција.
Фото: Министерство за економија