Павле Беловски беше избран за в.д. претседател на Самостојниот синдикат на новинари и медиумски работници (ССНМ) на Собранието кое се одржа во саботата, информираат од таму.
На Собранието кое за првпат се одржа онлајн, Беловски едногласно е избран за претседател на ССНМ, каде го наследува Ѕвездан Георгиевски, кој ја водеше организацијата во изминатите две и пол години.
На Собранието е донесена и одлука за проширување на Извршниот одбор (ИО) од досегашните 9 членови на 13, пред се со синдикалните претставници од медиумите кои имаат формирано синдикални групи.
Покрај Маја Јовановска, Павле Беловски, Тамара Грнчароска, Роберт Атанасовски и Теофил Блажевски, кои учествуваа во работата на ИО и во изминатиот период, дел од Извршниот одбор на ССНМ во наредниот ќе бидат и Сунаи Сабриоски, Зоран Маџоски, Марина Илиевска, Тамара Чаусидис, Теодора Цветковска, Жарко Јорданоски, Перо Момировски и Игор Стефановски.
На Собранието биле разгледани и активностите на ССНМ во минатата година, од кои биле издвоени потпишувањето на Колективниот договор со МИА, низа јавни дебати и работилници, издавање на публикацијата „Новинарството како јавно добро“ и други тековни активности поврзани со работничките права на новинарите и медиумските работници.
Усвоен е и приложениот финансиски извештај за работата на ССНМ за 2020 година, а е усвоена и измена на Деловникот за работа на Собранието што се однесува за користење на електронска платформа за одржување на седници.
Фото: Фејсбук/Беловски