Премиерот Зоран Заев вчера најави дека се можни предвремени парламентарни избори доколку во Собранието не се изгласаат уставните измени што ги предвидува Договорот со Грција. Како можен датум за избори го најави 25 ноември, но, законите велат поинаку, пишува meta.mk
На 23 јули во Клубот на пратеници, на лидерска средба помеѓу четирите најголеми политички партии требаше да биде договорен став за референдумот. На последниот ден преговори, Заев, на средина на денот излезе и потврди дека партиите договориле измени на неколку закони но дека не постигнале договор за референдумот. Тој тогаш соопшти дека се договориле за „пржинска влада“ пред секои избори.
Собранието по два дена ги изгласа овие измени со 99 гласа „за“.
– За овие три лидерски средби требаа многу нерви, трпение и лидерство. Се договоривме денеска да заврши лидерската средба, а каков договор ќе постигнеме зависи од сите нас. Го прифативме барањето, техничка влада, според формат идентичен на пржинскиот, да ги спроведува секои следни избори. Останува да се договориме за референдумското прашање, карактерот на референдумот и датумот на негово одржување – изјави кратко Заев.
По два дена, измените на законите стигнаа до пратениците и беа изгласани без никаква расправа. Тогаш ударна вест беше дека е избрана новата Државна изборна комисија, а измените на Законот за влада останаа незабележителни затоа што се брзаше со процедурите за спроведување на референдумот.
Измените на Законот за влада предвидуваат 100 дена пред денот на одржување на избори за пратеници во Собранието а по претходна оставка на претседателот на Владата на Република Македонија, Собранието на Република Македонија ќе избере нова, преодна Влада за спроведување на избори на пратеници, предводена од нов претседател на Влада кој го номинира најголемата политичка партија што го формира владиното мнозинство.
Предвидено е и да се избере нов министер за внатрешни работи и за труд и социјална политика на предлог на опозицијата со најголем број на пратеници во Собранието, по претходна консултација со двете политички партии со најголем број на пратеници во Собранието на Република Македонија.
Оваа „пржинска влада“ предвидува и дополнителни заменици министри за надворешни работи и на труд и социјална политика предложени од владејачката гарнитура. На предлог на опозицијата ќе има дополнителни заменици министри за финансии, за земјоделство и за информатичко општество.
Мета/Фото: Влада на РМ