Полицијата изгубила два дена во проверка на момче од Шведска, кое на профилот имало знамиња на Исламската држава (ИСИС), со кое комуницирала убиената 14-годишна Вања Ѓорчевска од Скопје, откри на денешното рочиште Дејан Димовски, началник на единицата за насилен криминал во СВР Скопје.
Тој посочи дека полицијата работела на различни теории, сугерирани од родителите на Вања, а во случајот со момчето не нашле никаква поврзаност со нејзиното убиство.
„Работевме на различни теории произлезени од родителите, а една од нив беше поврзана со нејзиниот виртуелен дечко од Шведска,“ рече Димовски, кој појасни дека со него Вања разговарала на англиски јазик, а деталите што ги откриле на неговиот профил ги вознемириле истражителите.
„Го проверивме профилот и забележавме дека на неговата страна имаше знамиња поврзани со ИСИС. Тоа го направи случајот уште посериозен и веднаш вклучивме колеги од други оддели за да ја провериме таа можна закана,“ рече тој, посочувајќи дека се преземале обемни проверки, вклучително и соработка со шведските власти, како и проверки на границите, но истрагата не резултирала со конкретни наоди.
„За жал, сите проверки беа негативни и оваа трага не водеше никаде. Изгубивме два дена работејќи на оваа теорија,“ рече Димовски, објаснувајќи дека полицијата морала да одземе телефони и компјутери за детални анализи, кои траеле неколку дена.
ПОВРЗАНИ ВЕСТИ
Обвинетите Манев и Видевски посочиле на вмешаност на таткото на Вања