Во Загреб, Хрватска е уапсен, па ослободен поранешниот началник на Петта управа на МВР, Горан Грујевски, обвинет во три случаи на поранешното Специјално јавно обвинителство, кој неколку години е во бегство.
Според телевизијата Клан, која ја објави информацијата, тој бил пуштен откако лица од грчката амбасада во Хрватска го посетиле и побарале негово итно ослободување, бидејќи има азил во Грција, а во Загреб бил во посета на неговиот син кој студира во Хрватска.
Избега во јули 2017 година и е еден од обвинетите за случајот „Таргет-Тврдина“, предметот за нелегалното масовно прислушување. Во октомври лани со измените на Кривичниот законик, Кривичниот суд во Скопје донесе решение за запирање на кривичната постапка за него и другите обвинети, а овој судски процес продолжува за делот што се однесува на уништување на опремата.
Тој е обвинет и во предметот „Тврдина 2“, кој се однесува на незаконското палење на списи и документи на Управата за безбедност и контраразузнавање, докази за масовно прислушување на граѓани, како и во предметот „Трезор“, кој се однесува за незаконска набавка на опрема за прислушување од Велика Британија.
Фото: МВР