Откако од здружението за заштита на животни „Анима Мунди“ објавија информација дека заменик директорот на „Македонија пат“, Сашо Дранго од Демир Хисар, убил мечка и објавија негови фотографии со мртва мечка на која е со пушка, Основното јавно обвинителство во Битола отвори предмет за случајот.
Од здружението најавија и кривична пријава за Дранго, а информираа дека фотографиите ги добиле на мејл.
Дранго, пак за телевизијата Телма вели дека тој не ја убил мечката и тврди дека таа била усмртена при сообраќајка.
Тој за телевизијата сподели и дека во лов на мечки бил во Финска од каде има фотографии со мечки.
„Сега пред еден месец имав случка и слика со мечка која на патниот правец Битола-Ресен беше усмртена при сообраќајна незгода. Па како вработен во Македонија пат бев таму за што има записник и во полициската станица во Битола и таа мечка ја отстранивме од коловозната лента во месноста Ротино, битолско. Станува збор за таа мечка која е на фотографијата“, вели Дранго за телевизијата.
Според македонското законодавство за мечката има трајна забра за лов.