Од 16 пожари на отворено во последното деноноќие, изгаснати се 13, два сѐ уште се активни и еден е под контрола, информираа денеска од Центарот за управување со кризи (ЦУК).
Активни пожари има кај селото Тажево, Општина Македонски Брод, крак кон Белица и крак кон заштитеното повеќенаменско подрачје Јасен од посебно значење за државата, во правец кон месноста одделувачи за струја.
„Се дејствуваше со еден полициски хеликоптер од воздух, а од земја со 30 припадници на МВР од Единицата за брзо распоредување (ЕБР), еден тим од четири пожарникари на ТППЕ, осум вработени од Јасен, и еден вработен од ЕЛС, каде што гори борова шума и на планината Серта, Општина Штип, кај Криволак во правец кон село Пенуш, кај месноста Чешмедарски Рид , каде што гори ниска вегетација“, информираа од ЦУК.
Од Центарот информираа дека под контрола е еден пожар на отворено и се настојува да се доведе во фаза на локализирање за потоа и да се изгасне.
„Тоа е пожарот во Општина Демир Хисар, на Илинска Планина во реон помеѓу селото Слоештица и селата Брежани и Плаќе. Дејствуваа од воздух, два ер трактори на ДЗС, тим од четири пожарникари на ТППЕ и 14 припадници на Национални шуми, каде што гори ниска вегетација“, велат од ЦУК.
Фото: МВР